有時要建立一樣嘢係要花好多時間. 好似事業, 家庭. 友誼... 起碼都要花三, 五, 七年去建立. 不過你又可以用幾分鐘去破壞, 將成件事歸零.

由細到大都好想擁有自己既一間屋. 五, 六件前都仲係一件好遙遠既事. 點知一場沙士就令我可以夢想成真.

但當你擁有時, 又可能唔係係想像既一回事. 入伙前裝修搬屋, 到入伙後執屋維修, 都係一件好花力氣既事. 但有更多更多往後既事你跟本就控制唔到. 又或者係自己有意無意間改變咗但自己唔知. 原來我都唔係咁需要擁有一間屋.

原來好多事都可以歸零, 只以你肯去想, 肯去做, 同埋唔怕唔捨得. 頭兩樣做得到, 但"唔捨得"就有啲難攪. 先旨聲明, 去想去做唔代表係好定唔好. 好唔好自己知.

唔捨得可以係好多嘢. 係乜連自己都唔願多提. 總知就唔捨得. 既然要歸零, 就要所有嘢歸零, 冇得畀你揀. 我亦都唔想揀.

一分鐘, 六個簽名, 原來可以快到咁. 仲好, 諗都唔洗諗. 只不過係唔捨得. 日子每天每天咁過, 我信時間可以沖淡一切... 只要自己覺得值得就可以...

以前成日講笑話最好有粒Undo Bottom畀我就好, 原來我係需要一粒Reset制.

做人最緊要識得"留白", 即係畀啲位自己轉彎, 唔好吓吓去到咁盡.

去到咁盡, 返唔到轉頭, 又攪到自己, 有乜謂?

"留白"係一門學問, 又係一門藝術. 就好似影相咁, 要識得收, 識得放, 唔係乜嘢都要影晒入去. 留啲位, 畀啲空間自己, 畀啲空間大家.

唔記得幾時聽過呢個terms, 但係就好深印象...

人大咗, 更要去學識"留白"既道理. 你學識咗未?

 

p.s. 呢排好想放吓假, 走轉日本入吓貨可能係一個好選擇!