好耐冇寫過Blog, 耐到自己都唔記得上次寫過啲乜....
總算安定下來. 但點都要重新適應. 日常生活, 朋友相處, 工作學習, 都要一點時間去作調適.
自己一向都好鐘意買嘢, 乜都買得一餐, 但之前真係買到怕, 連續十幾日係咁買, 係咁諗, 驚死買灟, 買到唔想再出街, 所有嘢都係由零開始建立, 希望冇下次. 就算有, 我諗情況應該同今次完全唔同.
自己係屋企整咗個Quality of Life Corner. 一聽就知勁嘢, 獨欠一部咖啡機, 6千幾蚊, 仲諗緊買好唔買好.
學財政司長所講, 最難既情況仲未到, 但總有些難過的情況卻經過了. 想像同要真正面對永遠有些距離, 無論你諗得幾周詳, 事實好可能你點都諗唔到. 點都好, 總要捱, 總要處理. 既然諗唔到, 就到時再算. 偷得浮生半日閒, 我都好希望可以得閒....
生意差, 仲要落井下石, 驚死你唔死. 預計下半年個市點反彈都與我無關, 而家忙到死, 開會由朝開到晚, 好似唔洗做咁, 但一想到下半年可以日日食TEA遊山玩水, 宜家辛苦啲又有乜所謂!! 不過好可能連份工都冇埋, 都係學定一技之長, 雞蛋仔夾餅墨魚波波之類, 賣唔到起碼自己都有得食...
仲有十科八科要讀, 讀極都讀唔完, 今個sem簡直作死, 又測驗又多功課又要考試, 話晒我都係客, 我畀錢讀書洗唔洗做咁多嘢呀!!
放低咗一排既攝影又可以再次專心去鑽研, 今次要有break through, 總知就大單嘢, 後現代主義加北歐風情再加陀地制作.
最後要多謝身邊既朋友仔, 兩個字 “心照”!!

有時以為自己可以控制某些事情, 但原來係控制唔到, 甚至乎到失控O既地步!!
試過揾出原因點解會咁, 但越揾越覺得奇, 以為係, 但又唔似係. 索性有得佢死, 費事諗.
腦就得一個, 唔係吓吓可以multi-tasking, 不如諗吓D實際嘢好過, 呢排實在太多嘢做, 太多嘢諗, 畀多24小時我都唔夠.

註: 天氣涷, 鼻敏感發作, 如果見到我好以見鬼一樣, 唔好意思, 我都唔想, sorry~~~

有點突然, 但又係預計之內, 事情好快由初時的不知所措到冇咗件事, 由始到終唔洗一日!!!
我好明顯係一個殘忍o既人, 先要學識點樣對自己殘忍, 慢慢就會懂得對身邊所有人同事都殘忍.
可惜的是有些人不懂收, 不懂放. 對自己對人殘忍都有一個限度, 唔可以超越自己的底線. 即係點.... 唔好將自己o既痛苦建築係自己o既痛苦身上, 這樣是很不智的, 負負係唔會得正!! 當你連身邊朋友都唔認同的時候, 朋友想幫都幫唔到.
錯好明顯係錯係自己身上, 冇得解釋亦唔洗去解釋. 過程既漫長又痛苦, 但既然自己要咁做, 冇得怨, 亦都唔會怨. 咁大個人自己做緊咩都唔知咩! 點樣都會為自己所做既一切負責. 問題係都要畀我去負責, 唔好下下set個局畀我先得. 我入局係因為我去面對, 但希望當局者都要理性一點, 唔好做一些吃力不討好o既事, 大家會了解, 但唔會認同.
其實心情不太差, 自我調節得幾好, EQ又高咗, 係咪即係可以再殘忍D.....我希望唔洗, 都唔好去迫我. 我成日都話事情已經好差, 但都唔洗死得咁慘, 留番D餘地畀自己......

好耐冇寫Blog, 不過真係諗唔到個題目點寫, 就有得佢打四個問號算數.
08年11月同12月... 我諗我死嗰刻都會記住呢兩個月. 好多嘢發生, 開心唔開心, 想死唔想死, 好煩到唔係好煩, 總知所有嘢都係得一同零, 冇晒中間位.
路係自己揀, 雖然我信命, 但都要自己揾條路先得. 條路係難定易自己心中有數!! 唔洗話我知點行, 我自己好清楚.
由細到大都好識為自己打算, 正所謂自己揀, 冇得怨. 行錯行對自己會負責. 可幸出世到現在為止冇乜嘢自己覺得有憒憾. 我深信以後的日子都係一樣. 因我是一個向前看的人. 過去咗就係過去咗, 諗以前又有咩用呢?? 我毎腦已經好忙, 日日係咁轉, 仲邊有時間諗以前???
面前仲有好多嘢要解決, 今次真係有排攪, 不過自己心甘命怟. 點解, 因我唔想到幾十歲人諗番轉頭覺得有憒憾囉!!

久病不清, 心神彷彿. 就係咁樣開始新的一星期.
Vincent & Bonnie 今日飛SG開 MS Operation Conference, 成個星期見唔到佢地, 一早又收到Freeman同事call sick, 點知返到公司先知連呀Ray都病埋......
Oh My Godness...... 早知我都病啦, 咁成條MS Team都可以休業一天. 結果一個頂五件, 我覺得自己收咁貴人工實屬超值.
好彩金融海嘯冇乜嘢做, 如果唔係你地一個二個返嚟就知死!!
(以上好明顯係亂o翕, 我咁愛惜我o既teammate, 之前嗰晚又請佢地去食飯 (仲要連埋班"貪得無厭"同事), 我又點會咁衰對佢地呢, 病就多D休息, 我會努力頂住個檔口!!)

病咗幾日, 食完藥個人就好浮, 又唔係好瞓得, 浮上加浮....
心情都好浮, 有時都唔知做好定唔做好. 真係做又死唔做又死. 自己玩自己!
唔知呢種心情同身體狀況要維持幾耐呢? 病就話食藥會好, 但心情起伏又點醫呢??

唔知係咪年紀大, 定係畀人卒得太勁, 呢排身體唔多好. 郁D就病, 今日就真係病到死死吓.....
病就梗係要睇醫生食藥瞓覺. 頭兩樣都OK, 瞓覺就真係攪唔掂!! 瞓覺喎, 咪即係浪費晒D時間. 係公司唔願做還唔願做, 但瞓覺就真係過唔到自己嗰關. 所以病都繼續開機做, 頂多做慢D. 不過D藥真係好以安眼藥咁, 一食就好想瞓. 點解醫生唔可以開D"無睡意, 提子味"o既藥畀我呢??
呢排真係靜到爆, 作為一個病人留係屋企可以做d咩呢??

1. 繼續做, 不停咁做公司嘢. 等你d同事以為你好勤力
2. 聽周杰倫新碟, 次次都唔知佢唱乜, 終於有時間拎住張歌詞睇吓佢唱緊乜嘢話
3. 聽John Legend, 平時又係唔知佢唱乜, 又可以拎住歌詞一齊唱. 不過有時拎住都唔知佢唱乜, 呢D係咪叫做勁呢??
4. 研究兩隻貓平時有乜做.... 發覺佢地都係冇嘢做. 係咁瞓
5. 攪吓之前影咗十世但都唔得閒執o既相. 再次發現Howard係Post皇!
6. 買Bank Draft交學費. 不過已經遲咗幾日, 同埋澳紙又升番
7. 睇住奧巴馬當選成為史上第一位黑人美國總統

只要唔瞓覺, 其實做到好多嘢. 不過病真係應該瞓覺, 我而家就去瞓瞓先. 真係好眼瞓........

唔知點解今日諗起Beyond....
我唔係Beyond Fans, 但點都會識Beyond o既歌.
Beyond o既歌詞大部份都好簡單, 因為係咁, 所以好易會有共鳴, 唔似而家D歌詞有咁複雜得咁複雜, 聽極都聽唔明
記得讀書時好鐘意Beyond其中一首歌, 次次去K都唱. 而家睇番D歌詞, 唔...... 有種苦澀o既感覺.

註: 係屋企開咗支白酒飲, 甜過糖水, 冇Château有出過糖水咩, 話晒都係2003好年份喎!?

繼上次"好眉好貌生沙虱"後, msn最近改咗"心裡心裡有個謎", 有朋友仔問我點解??
umm....... 其實呢個"謎"都謎咗好幾年, 既然都謎咗幾年, 咪有得佢謎落去囉. 謎底係一個既定事實, 一個冇得去改變o既事實, 自己又唔想因去解謎導致自己失望. 總知就有得佢啦.
可能有日自己飲大兩杯會講畀你知, 不過唔該請我劈番幾round先.
如果你又明明地我講乜而又想verify一吓, 請我食餐飯啦. 我估到有人知我講乜, 仲唔止一個tim.... 又好似幾好玩喎. 嘻~~

我唔係木村粉絲 但都鐘意睇佢D戲同電視劇.
好多人都話下面個廣告係key個頭落去. 但木村係我心目中係"神", 呢d咁o既舞又點難到佢呢. 大家一齊睇睇研究吓

過多兩日就和八月講再見。
八月的心情不大好，電腦節其間更覺比死更難受。天氣時晴時雨，所有東西都總要走向兩極，沒有中庸，沒有灰色，只有黑和白，對與錯....沒有喘息空間，也沒有避難所。
失望，因為見到管理層的坐視不理。不要和我說不在香港這些低等的籍口，世界是平的，何況我們是一間IT公司。你們遲一小時的決定，我們就要被多駡一遍。也不要向我說今次是一次經驗這些癈話，請你先多看幾本書增加自己的知識才和我說。
疲倦，因為身體不好。背部的痛楚揮之不去，加上感冒久久不瘉，整天總是渾渾頓頓。
空洞，手中的指南針總是不停打轉，方向何時才出現呢？心裡總是有點十五十六，明知沒有可能，也不可以，但總幻想著丁點希望。夢想，可以成真嗎？還是沒必要去成真。
渾濁，身邊的人總帶給你大小的麻煩，你們可以長進點嗎？你們可遠離我一點嗎？我需要一點新鮮的空氣。
九月的生活應會比八月更糟，唯有硬著頭皮，合上雙眼直闖。你能幫我一把嗎

• 40步跑完100米
• 跑到70米開始收步
• 100米贏5個身位
• 9秒69破世界記錄